ممنوع الانتظار على كورنيش الفلل

النهارده الخميس ومن المعروف أن منطقة الفلل تكون وجهة الكثير ممن يرغبون فى الخروج واستنشاق الهواء يوم الخميس

ممنوع الانتظار على كورنيش الفلل

النهارده الخميس ومن المعروف أن منطقة الفلل تكون وجهة الكثير ممن يرغبون فى الخروج واستنشاق الهواء يوم الخميس، والجلوس على الكورنيش مع الأهل والأصحاب للاستمتاع بالهواء الطلق أو لأى غرض أخر وده مش وقته للنقاش.

لكن هذا الخميس سيكون مختلف، فأذا كنت من يذهبون إلى الكورنيش ومعهم سياراتهم، فأحذر ممنوع الانتظار على كورنيش الفلل. ولا أحد يعرف السبب كالمعتاد، لذلك فأمامك حل من الاتنين يا صاحب السيارة أما أن تنزل للشوارع بدون سيارتك، أو تقوم بركن سيارتك فى الشوارع الجانبية فى منطقة الفلل وهذا ايضًا سيكون أمر صعب لأن الشوارع الجانبية ليست فارغه ولكن يوجد بها سيارات ساكنى الفلل.

ربما يكون سبب هذا القرار منع الزحام فى منطقة الفلل، ولكن عمرنا ما شوفنا أن طريق الكورنيش بيكون واقف وبه زحام شديد نتيجة للعربات المنتظره على الكورنيش. وكمان بدل ما نطلع قرار زى ده، طيب ما نشوف الأزمات المرورية اللى فى مختلف شوارع بنها ونحلها الأول وبعد كده نبقى نشوف حوار الركنه عشان المنظر الجمالى ده.

وكمان قرار زى ده هيعمل حاجه بسيطه جدًا أنه هيزيد من الزحام فى الشوارع الجانبية فى منطقة الفلل، والحل أن اللى معاه سيارة يبقى يطلعها معاه البيت أو يركنها فى وسط الشارع لأنه مش هيلاقى ركنه.

طيب القرار ده حلو وزى الفل بس لو كان تم منع الركنه على الكورنيش بعد ما تم تحديد منطقة وساحة لانتظار السيارات، ولا لازم القرار يطلع ويعمل الأزمة وبعد كده نبدأ نقول ايه الحل، ما هو الحل سهل وبسيط نعمل مكان لانتظار السيارات وبعد كده نمنع الركنه على الكورنيش عشان المنظر الجمالى.

سكان بنها كل يوم فى معاناة مختلفة بسبب القرارات المرورية والتحويلات المرورية التى لا تنتهى، واللجوء للحلول السهله وعدم النظر للحلول الجذرية التى تعالج المشكلات.

Log In