البرج اللى عليه الدور للإزالة بالقليوبية
التساؤل الذى يدور الأن فى أذهان المواطنين بمحافظة القليوبية ما هو البرج اللى عليه الدور لكى يتم إزالته؟ حيث تشهد محافظة القليوبية حملة لإزالة التعديات على الأراضى الزراعية. حيث تقوم الأجهزة التنفيذية التابعة لمجلس مدينة بنها بمحافظة القليوبية بالتعاون مع الأجهزة الأمنية وشرطة بنها بإخلاء الأبراج السكنية المخالفة ليتم تفجيرها.
تمام ديه قرارات كويسه جدا أصل لازم نستعيد هيبة الدولة، بس سؤال كده محير هو البرج وهو بيتبنى كان “لابس طاقية الاخفاء” ولا ايه، لازم نستنى أما البرج يتبنى والناس تدفع فلوس وفى الاخر يتهد. طيب يعنى مكنش ينفع يتعمل تصالح أو نخلى صاحب البرج يدفع غرامة كبيرة للدولة، أو الدولة تستلم البرج وتخليه لمحدودى الدخل او لسكان العشوائيات أو تعمل بيه أى حاجه مفيده، ولا هو لازم يتهد.
سؤال كمان هى الأرض اللى بيتبنى عليها مش بيتبقى صالحه لأى حاجه تانيه غير البناء، يعنى على سبيل المثال لو أرض زراعية وحد بنى عليها خلاص الأرض ديه مش هتنفع الا للبناء ومش بتكون صالحه تانى للزراعة.
طيب هى مشاكل المحافظة اتحلت بعد أعمال الازالة ديه للابراج اللى بيدفع تمن ازالتها صاحب البرج والناس اللى اشترت فى الابراج ديه، وكمان مين هيعوض الناس اللى اشترت فى الابراج ديه.
سؤال كمان أعمال تفجير الابراج ديه بتكون تكلفتها عاليه طيب ليه التكلفة ديه متتوجهش للغلابه اللى مش عارفين يجيبوا الاكل فى ظل ارتفاع الاسعار المبالغ فيه.
بس خلينا نقول أن أهم حاجه هيبة الدولة، وان احنا لازم نتحرك متأخر عشان تكون الخسائر أكبر، وأن احنا بنختار الحلول الأسهل دايمًا.