أزمات السوزوكى التى لا تنتهى

وأنت ماشى كده فى شوارع بنها العسل أو بنها المحروسه، بتلاقى عربيات السوزوكى أو زى ما بتتسمى “التمناية”. ايوه زى ما بقولك كده ثمانية يعنى يمكن عشان ولا حصلت تبقى نقل ولا حتى ربع نقل، المهم ده مش موضعنا.

وأنت بقى لسه مكمل فى طريقك هتلاقى ظاهرة غريبة قدامك كنا نسيناها من سنين، وهى أن سائقى السوزوكى الأجرة قاموا بافتراش طريق ميدان المحطة لوقف حركة المرور. قال يعنى المواقف بتاعت السوزوكى اللى فى كل حته فى بنها والتى تسبب الزحام الشديد والارتباك المرورى مش كفاية لتعطيل حركة السير.

نرجع تانى للموضوع لما سألنها ايه السبب من الاحتجاج ده، كان الرد أن المحتجون من سائقى السوزوكى الأجرة يطالبون بضرورة تطبيق القانون الصادر فى 2016 بضرورة تحويل ترخيص السيارات السوزوكى الملاكى إلى أجرة، وأضاف المحتجون أنهم يدفعون مبالغ مالية للدولة فى المقابل لا يوم سائقى السوزوكى الملاكى بدفع أى مقابل مادى للدولة. وطبعاً الموضوع ده مش جديد وكله شوية يتفجر، وتتردد الأنباء عن ضرورة تحويل السوزوكى الملاكى إلى سوزوكى أجره، وهتلاقى بعض سائقى السوزوكى الملاكى بيقولوا أنهم بيجيبوا السوزوكى عشان مشاوير للأسرة وليس لغرض الربح، ويبقى الوضع على ما هو عليه.

طيب ديه الأزمة ايه بقى الحل، نلاقى الرد أنه تم فض الاعتصام فورًا وإعادة حركة المرور إلى طبيعتها مرة أخرى، كما سيتم شن حملات مكثفة على سائقى السوزوكى الملاكى الذين يعملون بالأجرة للتحفظ على سياراتهم.

طيب ممكن كمان تتنظم حركة المرور شوية وتتمنع المواقف العشوائية للسوزوكى، وفى الحالة ديه الطرق هتتفتح وده هيسهل حركة المرور.

طيب مفروض الركاب يقومون بالاحتجاج هما كمان ضد جشع سائقى السوزوكى اللى بيقسموا خطوط السير لأكثر من مسافة عشان يحصلوا على مزيد من الأجرة. كمان السوزوكى اللى بيعمل على المخصوص فقط وبياخذ أجرة بتصل احيانًأ إلى 20 جنية فى مشوار مش بياخذ اكثر من ربع ساعه، فى حين وأنت راجع من القاهرة بتدفع 5 جنية فى مسافة 45 كيلو، ولو هترجع قطار هتدفع أقل من 20 جنيه. كمان السوزوكى بقى ليه استخدامات أخرى زى الخطف والقيام بالأعمال المنافية للآداب العامة.

مشكلات السوزوكى فى بنها مشكلات لا تنتهى وبالأخص المواقف العشوائية ديه.